Hochwohllöblechi Fasnachts-Schar,
MacSven? …isch das en britische Obernaar?
Wär do so dänkt, duet mir unrächt,
denn MacSven … isch es uralts Oltner Bürgergschlächt.
Sie hei müesse i dr Renaissance nach Ängland uswandere,
Als Narre und Gaukler sy mir greist vo eim Ort zum andere.
Mir hend improvisiert, s’Volk het apploudiert
und dr Shakespeare het dazumals jedes Wort mitnotiert.
Höt zieh e, dr MacSven, mit mine Banause-Trabante umhär.
Mir läbe vor Hand is Muu, üsi Geldbüttel sy lär.
De isch de rettendi Aruef vo Olte cho,
Im Stadttheater weti sie es Stück mit Niveau.
Was gisch was hesch hei mir packt und sy gfahre,
From Stratford-on-Avon …nach Olte-on-Aare.
So z’säge i eim einzige Satz:
Hyde-Park – Gäupark – Chloschterplatz
Sofort hend mir für es neus Stück afo riime,
Wie’s d’Oltner so triibe und d’Politiker schliime.
Doch scho nach der Premiere hend’s eus us em Stadttheater verbannt
Das Drama sig z’kritisch, z’fräch und z’riskant.
Jetzt schpiele mir halt weder uf dr Gass
Das bereitet üs sowieso vöu meh Schpass.
Drum lade mir jetzt Gross und Chlii,
I euses Schmiere-Theater ii.
Es wird Stück gäh wo luschtig sy und setigi wo quäle,
Als Untermolig darf d’Musik und de Dudelsack ned fähle.
Als fahrendi Schauspieltruppe wärde mir d’Oltner karikiere
Und allne das Oltner-Schmiere-Theater vor Ouge füehre.
Mir schpeuze so als Schauspieltruppe
Dr Oltner Politik i ehri Suppe.
Denn all die Gmeindrots-Hinderbänkler
Sy Zündstoff für eus Schnitzelbänkler.
Öb gäub, schwarz, rot, grüen,…mir hei d‘ Politik soo satt
Als einzigi bringe nämlech mir Fasnächtler Farb i die Stadt
Näme mir doch ar Fasnacht d’Glägeheit um das zäme z’fiire,
Und drum wot e ou ned länger lamentiire.
Liebs Theater-Publikum:
E freue me uf Euch, säge tschüss … bis denn
Euche Obernaar MacSven
